Во Стопанската комора на Северна Македонија се реализираше работна средба со д-р Пранвера Кастрати, директор на Секретаријатот на ЦЕФТА, која имаше за цел да се отвори дискусија за ефикасни механизми за надминување на состојбите во ситуациите кога некоја од договорните страни на ЦЕФТА воведува еднострани мерки кои ефективно ја попречуваат регионалната трговија, но и да се поразговара со македонските стопанственици за приоритетните предизвици во регионалната трговија со стоки и услуги.

На средбата, д-р Кастрати накратко ги изложи приоритетите во работењето на ЦЕФТА во следниот период, вклучувајќи го и воспоставувањето на зелените коридори и на граничните премини кои го поврзуваат регионот со Единствениот пазар на ЕУ, за што веќе се изготвени документи кои ги нотираат главните проблеми и предложените решенија за надминување на проблемите (преку инвестиции во инфраструктура, објекти и опрема, преку зајакнување на човечките капацитети, и преку интра-агенциска координација), кои се очекува да бидат формално одобрени од страна на лидерите од регионот до крајот на годината. Д-р Кастрати се осврна и на приоритетите за постигнување на целосно дигитализирана трговија (без употреба на хартиени документи), преку надоградување на SEED+ системот, надоградување на Traces системот, како и комплетирање на процесот на признавање на дигиталните потписи и сертификати помеѓу државите-потписнички на ЦЕФТА. Се осврна и на можностите за воспоставување на дополнително поволности за Овластените економски оператори, преку воведување на одделни ленти на граничните премини, но и комплетирање на процесот на признавање на нивниот статус и во размената со ЕУ.

Во дискусијата, компаниите се осврнаа на прашањата за потребата од дополнително поедноставување на царинските постапки и приоретизација на граничните премини за компаниите-овластени економски оператори, за можностите за воведување на целосно интегриран електронски систем за извозните и увозните процедури, за понатамошна либерализација на трговијата со овошје и зеленчук, но и за можноста ЦЕФТА да се заложува регионот да добива различен третман од сите останати трети земји кога станува збор за различните трговски политики и мерки на ЕУ.

Пред одржувањето на работната средба, организиран беше работен состанок на делегација на Управниот одбор на Комората, на која се дискутираше за неодамнешни активности во кои Комората беше ангажирана во однос на надминување на еднострано воведени нетарифни мерки кон македонските извозници од страна на една од договорните страни на ЦЕФТА, и беа дискутирани модалитетите за воспоставување на стандардизирани канали на комуникација помеѓу Коморите од подрачјето на ЦЕФТА и ЦЕФТА Секретаријатот, кој би овозможил навремено пријавување на ваквите ситуации до Комитетот на нетарифни мерки на ЦЕФТА, и соодветно постапување/одлучување по тие пријави од страна на Комитетот.