Во гостување на утринската емисија на Телма, претседателот на Клубот на извозници при Стопанската Комора на Северна Македонија, проф. д-р Дарко Лазаров посочи дека економските состојби на глобално ниво со воведувањето на трговските и протекционистичките мерки не се посакувани за македонскиот извоз, но истовремено тој потенцираше дека македонските извозни компании се жилави и ќе ги надминат предизвиците од глобалната трговска војна.

Потребни се координирани чекори на сите чинители во извозниот еко-систем и тоа може да се обезбеди преку Националниот совет за извоз како механизам за јавно-приватен дијалог помеѓу Владата и Стопанската комора на Северна Македонија на теми поврзани со извозот.

Комората во изминатиот период преку концептот за извоз базиран на Националниот совет за извоз, Клубот на извозници и Институтот за извоз ги постави своите институционални капацитети со цел обезбедување на стручна, техничка, организациска и логистичка поддршка за македонските извозно ориентирани компании. Клубот на извозници веќе работи на организирано учество на повеќе меѓународни саеми и Б2Б настани за своите членки, додека Институтот за извоз го операционализираше својот план кој подразбира организирање на специјализирани обуки за извозниците, спроведување на пазарни анализи и стратегии за настап на нови пазари, техничка поддршка за воведување на меѓународни стандарди за квалитет.

Сето тоа ќе им помогне на компаниите во надминување на глобалните предизвици, но и ќе креира нови можности за нашите компании да ја зголемат својата присутност на регионалните и меѓународните пазари, посочи Лазаров.

На крај, професорот Лазаров посочи дека градење на извозна конкурентност, поголема извозна промоција и олеснување на тргвоските бариери се клучните прашања на кои активно ќе работи Стопанската комора заедно со Владата на РСМ преку Националниот совет за извоз.