Врз основа на член 187 став (5) од Законот за енергетика (*) („Службен весник на Република Македонија“ бр.96/18 и „Службен весник на Република Северна Македонија“ бр.96/19 и 236/22), Владата на Република Северна Македонија, на седницата, одржана на 16 јануари 2024 година, донесе

Со оваа програма се уредува вкупната инсталирана моќност на електроцентралите по вид на технологии за кои ќе се доделува премија по спроведена тендерска постапка и склучени договори за користење на премија во 2024 година и износот на средствата потребни за исплата на премиите за произведената и продадена електрична енергија во 2024 година.

Средствата за реализација на оваа програма изнесуваат 30.000.000,00 денари и се утврдени во Буџетот на Република Северна Македонија за 2024 година, Раздел 10001 Министерството за економија, Потпрограма 32–Развој на енергетика, Категорија 46–Субвенции и трансфери, Ставка 464 –Разни трансфери.

Средствата за реализација на оваа програма се наменети за финансиска поддршка за производство на електрична енергија од повластени производители кои користат премија како дополнителен износ на цената која ја остварил со продажбата на произведената енергија на пазарот на електрична енергија.

Средствата утврдени во член 2 став 1 од оваа програма ќе се користат за исплата на премии за произведената и продадена електрична енергија од повластени производители кои користат премија во 2024 година.

Корисници на средства од оваа програма се производителите на електрична енергија кои што во согласност со Законот за енергетика (*) се стекнале со право на користење на премија.

Средствата од член 2 став 1 на оваа програма се наменуваат за исплата на премии на повластените производители кои произведуваат електрична енергија од фотонапонски електроцентрали, со вкупна инсталирана моќност не поголема од 90 MW.

Максималниот референтен износ на фиксна премија за производство на електрична енергија во 2024 година изнесува 15 €/МWh за фотонапонски електроцентрали.

Средствата од член 2 став 1 на оваа програма се доделуваат врз основа на договори за користење на премија склучени помеѓу Министерството за економија и корисникот на средствата.

Исплатата на средствата од член 2 став 1 на оваа програма се врши од страна на Министерството за економија на месечно ниво, врз основа на доставено барње за исплата на премија за продадена електрична енергија, произведена од сопствено производство за претходниот месец. Кон барањето се доставуваат: фактура за испорачана електрична енергија на купувачот и податоци од операторот на електропреносниот систем, односно електродистрибутивниот систем за измерена и испорачана енергија во соодветната мрежа, како и друга документација согласно договорот за користење на премија склучени помеѓу Министерството за економија и корисиникот на средствата. Износот за плаќање на премија се изразува во денари според средниот курс на Народна банка на Република Северна Македонија на последниот работен ден во календарскиот месец за кој се однесува фактурата.

За начинот и динамиката за реализирањето на оваа програма се грижи Министерството за економија.

Оваа програма влегува во сила наредниот ден од денот на објавувањето во „Службен весник на Република Северна Македонија“.

Бр. 41-800/4            Заменик на претседателот

16 јануари 2024 година на Владата на Република

Скопје                          Северна Македонија,

                                   м-р Бојан Маричиќ, с.р